Үгүс үйэлэри уҥуордаан кэлбит сахабыт төрүт үгэһэ Ыһыах – Айылҕа уһуктуутун уонна силигилии ситиитин, дьон-сэргэ олоххо тардыһыытын уонна кэрэ5э дьулуһуутун кэрэһилиир, көлүөнэлэр алтыһыыларын түстүүр ытык бэлиэ кэминэн буолар. Өрөгөйдөөх тэрээһиҥҥэ норуот ис кэрэтэ, ураты талаана, дьо5ура арылхайдык көстөр.
Ыһыах норуоттар доҕордоһууларын бөҕөргөтөр, республикабыт сайдарын, туругурарын туһугар күргүөмнээх үлэҕэ көҕүлүүр дьикти күүстээх. Дьон-сэргэ бу кэрэ-бэлиэ күнү сыллата долгуйа кэтэһэр.
Быйыл Сахабыт сиригэр биллиилээх суруйааччыбыт Анемподист Иванович Софронов – Алампа 125 сааһа бэлиэтэнэр, Хомус Аан дойдутаа5ы VII Конгреһа уонна Духуобунас форума киэҥ далааһыннаахтык ыытыллыахтара. Чулуу айымньыбытыгар – Олоҥхоҕо анаммыт Ыһыахпыт Мииринэй оройуонугар буолуо5а. Бу тэрээһиннэр биһиги инники сайдыыбытыгар улахан суолталаахтара саарба5а суох. Өбүгэ үгэһин, баай культуратын, төрөөбүт Ийэ тылбытын тэнитэр уонна сайыннарар сүдү соруктаахпытын өйдүөх тустаахпыт.
Ытыктабыллаах Саха сирин олохтоохторо!
Ыһыахха аҕа көлүөнэ кэнчээри ыччатыгар норуот сүүһүнэн сылларга мунньуллубут билиитин-көрүүтүн биэрэр, үтүө үгэстэригэр үөрэтэр. Ытык кырдьаҕастартан алгыс ылан эдэр дьон үтүөҕэ-кэрэҕэ тардыһара күүһүрэр, иннин диэки эрэллээхтик, эрдээхтик хардыылыыр.
Биир сомоҕо буола түмсэн, иннибитигэр туруоруллубут соруктары толоруохпут, дьон-сэргэ олоҕун тупсарыахпыт диэн бигэ эрэллээхпин.
Барыгытыгар кытаанах доруобуйаны уонна бары үтүөнү баҕарабын! Ыһыахха этиллибит алгыс үрдүк ситиһиилэргэ кынаттаатын, уйгуну-быйаҥы аҕаллын!
