Федерация Сэбиэтин саҥа тэриллибит үлэлиир бөлөҕүн салайыыны сүктэрбиттэрин быһыытынан, бу күннэргэ Уус Алдан, Чурапчы улуустарыгар уонна Дьокуускай куоракка бааһынай хаһаайыстыбаларын уонна кээпэрэтииптэр салайааччыларын кытта көрсүтэлээтим.
Миэстэтигэр дьону кытта кэпсэтиилэргэ тыа хаһаайыстыбатынан дьарыктанар араас тэрилтэлэр үлэлэрин атахтыыр туох кыһалҕалар баалларыгар тохтоон, федеральнай сокуоннарга ханнык уларытыылары киллэрэн, олору туоратар боппуруостары дьүүллэстибит. Бастатан туран, бааһынай, фермер хаһаайыстыбаларын анал туруктарын чуолкайдааһын, кэтэх хаһаайыстыба диэҥҥэ киирэр хаһаайыстыбаны ханнык ирдэбиллэринэн быһаарыахха сөбүн уонна, биллэн турар, билигин үлэлиир тыа хаһаайыстыбатын потребкооперациятын туһунан сокуон тула кэпсэтиилэр таҕыстылар. Фермердэр бачча тухары үлэлээн кэлбит уопуттара уонна кинилэри долгутар боппуруостарга көрүүлэрэ тус бэйэбэр улахан суолталаахтар.
Биир дойдулаахтарбар Федерация Сэбиэтигэр киллэрбит сокуону көҕүлээһиннэрбинэн туох-ханнык быһаарыылар ылыллыбыттарын тустарынан сиһилии билиһиннэрдим. Чуолаан, ЕСХН-ы төлөөччүлэргэ эбиллибит сыанаттан нолуогу тутуу (НДС) боппуруоһун быһаарыыга, Центробаан кредити биэриигэ үлэлиир тыа хаһаайыстыбатын потребкооперацияларын бүттүүннэрин хонтуруоллааһынын тохтотуу уонна онтон да атын суолталаах боппуруостарга туох үлэлэр бара туралларын кэпсээтим.
Өрөспүүбүлүкэ бырабыыталыстыбатыгар уонна тыа хаһаайыстыбатын министиэристибэтигэр бүгүҥҥү күҥҥэ тыа хаһаайыстыбатын кооперациятыгар баар быһыыны-майгыны чугастааҕы кэмҥэ ырытан, дьүүллэһэр наадатын туһунан кэпсэттибит. Биһиги бары өйдүүбүт - соҕотуопкалааһыҥҥа, тыа хаһаайыстыбатын табаарын оҥорон таһаарыыга, ону батарыыга кооперацияны күүскэ туһаныы эрэ түмүгэр кэлии бородууксуйаны кытта күрэстэһэр кыахтаныахпыт. Өрөспүүбүлүкэбитигэр баар кыра хаһаайыстыбалар оҥорон таһаарар бородууксуйаларын хаачыстыбатыгар аныгы кытаанах ирдэбиллэр усулуобуйаларыгар итинтэн атын суол суох дии саныыбын. Тус көрүүбэр, федеральнай сокуоннарга фермердэр санаалара учуоттанара сиэрдээх.
